دبئی: (بی بی یو ورلڈ نیوز اردو) ایشیا کپ ٹی 20 میں پاکستانی ٹیم آج اپنی مہم کا آغاز عمان کے خلاف میچ سے کرے گی۔
دبئی کرکٹ سٹیڈیم کے ’’رنگ آف فائر‘‘ میں ایشیا کپ ٹی 20 میں پاکستان اپنی مہم کا آغاز کرے گا، عمان پہلی بار ایشیا کپ کھیل رہا ہے، پاکستان کے حوصلے بلند ہیں خاص کر حالیہ سہ ملکی سیریز جیتنے کے بعد قومی ٹیم پراعتماد دکھائی دیتی ہے۔
عمان کیخلاف پاکستان کے میچ کو بھارت کے خلاف اتوار کے بڑے مقابلے سے قبل وارم اپ کے طور پر دیکھا جا رہا ہے۔
آج کے میچ سے قبل پاکستان کرکٹ ٹیم کے ہیڈ کوچ مائیک ہیسن نے دبئی کی پچ کا معائنہ کیا اور پریس کانفرنس میں اسے بیٹرز کیلئے سازگار قرار دیا۔
ہیسن کا کہنا تھا کہ پاکستانی ٹیم میں ملٹی سکلز کھلاڑی موجود ہیں۔
دوسری جانب عمان کی ٹیم کے کپتان جدیندر سنگھ نے پریس کانفرنس میں کہا ہے کہ پاکستانی ٹیم کا عمان سے کوئی مقابلہ نہیں ہے مگر ٹی 20 فارمیٹ میں کچھ بھی ہو سکتا ہے۔
اُن کا کہنا تھا کہ ایشیا کپ میں بڑی ٹیموں کے خلاف کھیلنا عمان کے لیے ایک اچھا موقع ہے۔
