دبئی: (بی بی یو ورلڈ نیوز اردو) ایشیا کپ میں میچ ریفری کے تبدیلی کے معاملے پر ڈیڈ لاک برقرار ہے ، تاہم یو اے ای کیخلاف میچ کیلئے ٹیم کو ہوٹل سے سٹیڈیم کیلئے روانہ کردیا گیا ہے۔
پاکستان اور یو اے ای کے درمیان آج دبئی سٹیڈیم میں میچ شیڈول ہے، یہ میچ پاکستانی وقت کے مطابق شام ساڑھے 7 بجے کھیلا جانا تھا۔
ترجمان پی سی بی عامر میر کا کہنا ہے کہ بات چیت چل رہی ہے، پاکستان اور یو اے ای کے میچ کا وقت ایک گھنٹہ آگے بڑھا دیا گیا ہے۔
ترجمان پی سی بی کے مطابق محسن نقوی کی نجم سیٹھی اور رمیز راجہ سے مشاورت جاری ہے، کوشش ہے کہ اچھی خبر سامنے آئے تو چیئر مین پی سی بی سب کو آگاہ کریں گے۔
اس سے قبل ذرائع کا کہنا تھا کہ پاکستان کرکٹ ٹیم کی ہوٹل سے سٹیڈیم روانگی روکی گئی، پاکستان کرکٹ ٹیم کو ہوٹل میں رکنے کا کہا گیا، کرکٹ ٹیم کے کھلاڑیوں کو اپنے کمروں میں جانے کی ہدایت کی گئی۔
ذرائع کا کہنا تھا کہ میچ ریفری اینڈی پائی کرافٹ کی معذرت کی صورت میں معاملہ ختم ہوسکتا تھا، پاکستان کرکٹ بورڈ میں اعلیٰ سطح پر مشاورت جاری ہے، چیئرمین پی سی بی محسن نقوی، سلمان نصیر، یگر عہدیدار میٹنگ میں موجود ہیں۔
واضح رہے کہ پاکستان کرکٹ بورڈ کو اینڈی پائی کرافٹ کو ہٹانے کے معاملے پر آئی سی سی کا کوئی جواب موصول نہیں ہوا۔
ذرائع کا اس حوالے سے کہنا تھا کہ ریفری تبدیلی کی تصدیق نہ ہوئی توپاکستان ٹیم اسٹیڈیم روانہ نہیں ہوگی۔
ذرائع کے مطابق چیئرمین پی سی بی محسن نقوی پی سی بی آفیشلز سے مسلسل رابطے میں ہیں اور پی سی بی کو آئی سی سی کی ریفری تبدیلی کی ای میل ملنے پر ہی ٹیم اسٹیڈیم جائےگی۔
