اسلام آباد: (بی بی یو ورلڈ نیوز اردو) آئی پی ایس او ایس نے الیکشن 2024ء سے متعلق نیا سروے جاری کردیا۔
پاکستان کے عوام جمہوریت کے تسلسل اور انتخابات کے انعقاد کے حوالے سے پرعزم ہیں، آئی پی ایس او ایس کے عام انتخابات کی شفافیت کے حوالے سے جاری پاکستان پلس سروے کے مطابق 76 فیصد پاکستانی الیکشن کے نتائج کو تسلیم کریں گے۔
سروے کے مطابق 17 فیصد نے کوئی رائے نہیں دی، دیہی علاقوں کے 77 فیصد جبکہ شہری علاقوں کے 74 فیصد لوگ نتائج کو تسلیم کریں گے، دیہی علاقوں میں انتخابات کی شفافیت اور نتائج کو تسلیم کرنے کے حوالے سے بہتر تناسب سامنے آیا ہے، خیبرپختونخوا 79، پنجاب 78، بلوچستان 63، سندھ 74، اسلام آباد میں 53 فیصد لوگ نتائج تسلیم کریں گے۔
جاری کردہ سروے میں مزید بتایا گیا کہ ووٹ نہ ڈالنے والے لوگوں کی جانب سے نتائج کو تسلیم کرنے کا تناسب 56 فیصد ہے، سروے کے نتائج اس بات کی نشاندہی کرتے ہیں پاکستانی عوام الیکشن کی شفافیت کے حوالے سے پر امید ہیں، پاکستانی عوام جمہوریت کے تسلسل کو ملک کی ترقی کا راستہ سمجھتے ہیں۔
