تہران:(بی بی یو ورلڈ نیوز اردو) وزیرداخلہ محسن نقوی نے کہا ہے کہ پاکستان نے ایران پر حملے کی کھل کر مذمت اور دفاعی حق کی حمایت کرتا ہے۔
ایران کے دارالحکومت تہران میں سہ ملکی کانفرنس سے خطاب کرتے ہوئے محسن نقوی کا کہنا تھا کہ کانفرنس کا انعقاد خوش آئند ہے، ہمارے لیے ایران اورعراق میں موجود زائرین اہم ترین ہیں، ہم ایران کو دفاعی حق کے استعمال پر مکمل سپورٹ کرتے ہیں، ہم آئندہ بھی ایران کے ساتھ کھڑے رہیں گے، وزیراعظم شہباز شریف اور دیگر آفیشلز نے اپنا کردار ادا کیا۔
انہوں نے کہا کہ ایران اور عراق میں موجود پاکستانی زائرین ہمارے لیے نہایت اہمیت رکھتے ہیں اور ان کی سہولت و سلامتی ہماری اولین ترجیح ہے، کانفرنس کے انعقاد پر ایران اور عراق کی حکومتوں کا شکریہ ادا کرتے ہوئے ایران کو حالیہ عظیم کامیابی پر مبارکباد پیش کی۔
وزیر داخلہ کا کہنا تھا کہ پاکستان نے ایران پر حملے کی کھل کر مذمت کی ہے اور ہم ایران کے دفاعی حق کی مکمل حمایت کرتے ہیں، پاکستانی عوام مشکل وقت میں ایرانی عوام کے شانہ بشانہ کھڑے رہے اور آئندہ بھی ایران کے ساتھ کھڑے رہیں گے۔
محسن نقوی نے کہا کہ وزیراعظم شہباز شریف اور دیگر آفیشلز نے اپنا کردار ادا کیا، سفیر ایران امیری ہماری کوششوں کے گواہ ہیں، پاکستان نے ایران کیلئے ہر فورم پر آواز اٹھائی، عراق کو بھی مکمل تعاون کی یقین دہانی کراتے ہیں، زائرین کے معاملے پر صرف رجسٹرڈ گروپس کے ذریعےعمل کیا جائے گا۔
ان کا کہنا تھا کہ زائرین گروپ کے سربراہ یقینی بنائیں گے کہ تمام زائرین واپس آئیں، کسی کو بھی غیر قانونی طریقے سے ایران ، عراق جانے کی اجازت نہیں دیں گے، پاکستانی زائرین کی دیکھ بھال کرنے پر ایران اور عراق کا شکریہ ادا کرتے ہیں۔
قبل ازیں وفاقی وزیر داخلہ محسن نقوی نے تہران میں ایرانی ہم منصب سے ملاقات کی جس میں باہمی دلچسپی کے امور اور پاک ایران تعلقات پر تبادلہ خیال کیا گیا۔
